खंय गेले आमगेले मूल्य ?
जाली आमी मृगां तुल्य
धर्म इतें कर्म इतें कळना
'हांव' म्हळेले लोका भार्य कांय ना
खंय गेले आमगेले मूल्य ?
सात वचन सांगून करताय व्हरडीक
'सात जन्मान्तुय एक्साण' म्होणु घालताय पिरडूक
सात दीस जावनु निमगीताय मोचन
ते पवित्र बंधनाक मोल दीनाय 'सज्जन'
खंय गेले आमगेले मूल्य ?
वडोवनु व्हड केलेले आवसु बापसूक सोणु
परगांवान्त वताय शिकवण, काम म्होणु
"पूतु येतलो" आवसु वाट पळयता
पूतु कर्मांतुय धर्मांतुय थकून दूर धांवता
खंय गेले आमगेले मूल्य ?
आवसूय बापसूय कामान्त व्यस्त
चेर्डाचे पशी व्हड कायरीं आसा मस्त
घालो व्होरनु दूर विद्यालयान्तु
बाल्य गेलें ताजे, पळ्ळो नरकान्तु
खंय गेले आमगेले मूल्य ?
चांग बलाव सांगून आवय बापून वाडयलें
काली मेळेले प्रेमी खातीर तांका फटयलें
निस्वार्थ जावनु तानी आमका सग दिलें
मनांतु दिसले कोरनु अामी तें रीण भरलें
खंय गेले आमगेले मूल्य ?
आबू आयी घरकडे आसाय म्हांतारीं
बळतूव्या वर्तमान उलयताय दोन चारी
घालो तांका व्होरनु वृद्धाश्रमान्तु
एक थेंबो नातिलें रगत दोळ्यान्तु
खंय गेले आमगेले मूल्य ?
संस्कार सोडूक कसले कष्ट ना
तरी धर्मांत परतून येवचाक कसली वाट ना
आज केलेले कर्मा फाय फल मेळतलें
बड्डी दिल्यार आमीच पेटूय घेतलीं
मूल्य न्हय आमीच शेणडून गेल्यांय ।
No comments:
Post a Comment