आयली रे शाळेन्तु परीक्षा
शीक रे ना आनी रक्षा
फप्पूणु काडी रे पुस्तक
हून जाता मेजे मस्तक ।
घरकारां म्हणताय शीक शीक
चेरडूवां जपीताय देवा राक राक
राति दीस एक केल्याय
शिकूनु जायना दीस लागी पांवताय ।
शिकूक गेल्यार मन्न पावना
मन्न पावल्यार मनान्तु जायना
मनान्तु जाल्यार उडगास येना
इत्ति कोरका कोणाक कळना ।
परीक्षा पांवता जाता भय
दोळ्यान्तल्यान व्हळताय न्हंय
देवारी ती भक्ति चडता
राम नाम जीबेरी खेळता ।
परीक्षा ती चांगी जावो
माका अंक चांग मेळो
तोणान्तल्यान उदाक आट्टयताय
देवाक इत्याक किर-किर करताय ?
परीक्षा मनुष्यांक विचारु दित्ता
देवाली ती शान्ती फरता ।।
No comments:
Post a Comment